Collaborations
W'ir prood tae a teamed up wi da follooin groups an projects fir twartree collaborative projects:
Microsoft SwiftKey
Microsoft SwiftKey is a free virtual keyboard app at lairns a body's writeen style an alloos code-switcheen ithin as mony as five languages. Wi da list ey growein, da keyboard supports mair as 400 languages eenoo, wi a braa twartree o dem marginalised, giein a digital voice tae minority languages. Wir tanks tae Julien Bailey an da Microsoft SwiftKey team fir dir splendid suppoart in helpin wis add Shaetlan tae da keyboard.
MIT Haiti
MIT Haiti wirks on a global as weel as a local scael pittin tagidder linguistics an technology tae come aheid wi giein social rights tae spaekkers o marginalised languages. Hit promotes technology-enhanced active lairneen an looks parteeklarly at Haiti an da øse o Kreyòl ithin science, technology, engineereen an maths (STEM) disciplines. W'ir prood tae be pairt o collaborative efforts tae mak lichtsome lairneen apps an share expertise an experiences wi MIT Haiti, wha, laek wis, tinks language is da braeth o culture an at language, culture an environment is aa connekit.
Marine Conservation ithoot Borders
Marine Conservation ithoot Boarders (MCB) is lookin tae pit forwird baith scientific literacy an biocultural diversity troo bilingual lairneen material at biggs apø baith modren science an whit indegenous fokk kens demsels. Projects at promotes biocultural diversity can see at linguistic diversity, sustainabeelity an resilience is a naiteral resource an commodity at gings alang wi biodiversity an environmental sustainabeelity an resilience. Laek wis, MCB tinks at language is da braeth o a culture, an at cultures growe an evolve wi dir environments ower coont less generations. W'ir prood tae be pairt o da MCB International team fir makkin materials laek yun.
Rivers Language Initiative
Da cosstal Rivers State o Nigeria is notted fir its linguistic diversity, wi at laest 28 language varieties spokken idda plaess, an a lok o dem is endangered. Da Rivers Language Initiative is wirkin tae promote an kyucker up da different languages aboot da staet, an tak back pride o plaess an identity, espeecially trowe technology an digital wyes. W'ir prood tae be collaboratin an sharin expertise wi Rivers State Initiative tae mak lichtsome lairneen apps.